మా తెలుగు తల్లీ !!

మా తెలుగు తల్లికీ మల్లెపూదండ !
మా కన్నతల్లికీ మంగళారతులు !
కడుపులో బంగారు, కనుచూపులో కరుణ
చిరునవ్వులో సిరులు దొరలించు మా తల్లి !! || మా తెలుగు తల్లికీ||
గలగలా గోదారి కదలిపోతుంటేను
బిరబిరా కృష్ణమ్మ పరుగులిడుతుంటేను
బంగారు పంటలే పండుతాయీ !
మురిపాల ముత్యాలు దొరలుతాయీ !! || మా తెలుగు తల్లికీ||

అమరావతీ నగర అపురూప శిల్పాలు
త్యాగయ్య గొంతులో తారాడు నాదాలు
తిక్కయ్య కలములో తియ్యందనాలు
నిత్యమై, నిఖిలమై నిలచి యుండేదాక !! || మా తెలుగు తల్లికీ||
రుద్రమ్మ భుజశక్తి, మల్లమ్మ పతిభక్తి
తిమ్మరుసు ధీయుక్తి, కృష్ణరాయల కీర్తి
మా చెవుల రింగుమని మారుమ్రోగేదాక
నీ పాటలే పాడుతాం ! నీ ఆటలే ఆడుతాం !!
జై తెలుగు తల్లీ ! జై తెలుగు తల్లీ !! జై తెలుగు తల్లీ !!!

- శంకరంబాడి సుందరాచార్య